蓄鬚明志、注射傷寒針 梅蘭芳堅決唔為日本人演戲

舉世聞名嘅中國戲曲藝術大師梅蘭芳相信唔少史友都聽過佢嘅名，佢喺京昆表演藝術方面嘅成就絕對係前無古人，而喺民族氣節方面更加值得大家學習！

生於清光緒二十年嘅梅蘭芳，祖父係京城著名青衣花旦演員梅巧玲，佢年幼時就由京劇琴師伯父梅雨田撫養，八歲學戲、十歲登台，憑住1913年喺上海演出嘅《穆柯寨》而喺上海一舉成名。成名之後嘅梅蘭芳去過好多地方登台，甚至曾經訪問過日本，並且引嚟當地「有此雙手，其餘女人的手盡可剁去」嘅評論，可見當時佢真係深受世界各地嘅人喜愛，甚至後來佢仲去過美國展開演出72日，真係不得了。

之不過，面對國仇家恨，就算佢自己嘅事業佢都可以放棄。喺上世紀三十年代，日本人就曾經搵人要求梅蘭芳到電台播音，當時佢就以要去香港巡回而拒絕；而當香港淪陷之後，日軍四處找尋梅蘭芳，而當時梅蘭芳相當清楚自己避無可避，最終就先係改變日常習慣，蓄鬚明志。而喺日本人再次強迫之下，佢就狠下心腸向自己打三次傷寒針，高燒不止之下最終令到日本人放棄。一位咁嘅戲曲藝術大師，喺國仇家恨面前係堅決唔為日本人演戲。